A Cung Ah Khuaruahhar Ngaimi Thil A Tlung

Ayeyarwaddy ramthen Chief Minister hlun U Man Jaw Ni cu NLD party in 1990 ram pumpi thimnak, 2010 caan karlak thimnak, 2015 kum rampumpi thimnak le 2020 rampumpi thimnak hna ah voi 4 bak teinak a hmutu a si. Atu hi ralkap uknak thalo thlak ding ah hmaisuan in PDF ah a telmi kum 80 upa, Karen miphun a si. Myanmar Now nih interview an tuahnak ah a chimmi a cungah khuaruahhar ngai in thil a tlungmi a chim chih.

Biahalnak an tuahmi cu, “Kum 80 upa, ramkhel riantuan pakhat nih tu bantuk harsa ngai in hriamnam tlaih in dohthlennak ah naa telmi hi zeibantukin thinlung thazaang he naa tel kho ve” tiah biahalnak an tuah. Cu biahalnak ah Chief Minister hlun U Manh Jaw Ni nih a tanglei bantukin khuaruahhar a sinak kong a chim. A lehmi cu,

Aa phundang ko. Keimah hi Hluttaw meeting kai ding in February hla ahkhan ka rak dam lo. Ihkhun cung ka tho hmanh ahkhin mi nih an ka tlaih i an ka hruai chawm. Cu bantuk dirhmun ka si bu in Naypyidaw ka phan i, Covid chek ding an ti tikah ball pen (cafung) hmanh ka tlai kho lo. Aa phundang ngai. Atu cu tha tein training ka tuah tikah tha tein ka tli kho.

Ka zawtnak vialte a tlau dih bantuk a si cang. Cucu zeiruangah a si ti zong keimah hmanh nih ka chim thiam lo. Zeibantuk sii hmanh ka hmang fawn lo. Vuanci ka si lio ah motor nih voi 3 bak a ka pah. Thi seh tiah, nain ka thi lo. Cun zawtnak pakhat hnu pakhat ka cung ah a phan, zeidah ka rak cang ka thei lo. Atu cu ka dam i, mah ning khel te ka si cang.

Atu hi ka tli khawh cang. Keimah bantuk kum upa tlik a ka zuamcawh duhmi tlik zuam khawh a si. Kei rian ka tuan rih lai, hahaha. Ka tha tuk. Ka hliphlau tuk. Ka nunnak chungah voikhat te lawngpei (hriamtlai) a si lai cu,” tiah lehnak a tuah hi a si. Hmasa i cu tluk a rak zawmi cu zei sii hmanh din loin PDF a lut bak ah khuaruahhar in a dam dih. Adang zeidah chim na duh rih tiah bia an halmi a lehmi cu;

“Mipi sin chimh ka duhmi cu, mipi dihlak nan itel ve ahcun kan tei dih hna lai. Mipi hi a biapi an si i, mipi lawng hi kan nu kan pa, mipi dihlak kan itel ahcun kan tei dih lai. Hi puai cu knockout bak in kan tei lai. Hi puai ahhin cun amah (ralkap) a tluk lo ahcun, kanmah (mipi) tluk a si ko lai. Kanmah kan tluk lo ahcun anmah an tluk ko lai” tiah lehnak a tuah hi a si. Laknak: Myanmar Now