Caan Karlak Matupi Peng Fimcawnnak Ca Ah Hlasak Thliainak In Tangka Kawlnak An Tuah Lai. Caan karlak Matupi peng fimcawnnak ca ah Matupi Peng Fimcawnnak Board nih, Mizoram Lawngtlai khua ah hlasak thliainak(ဖျော်ဖြေ) in tangka an kawl lai, tiah theih a si.
Mizoram Lawngtlai khua ah minung 200 tluk i tlumnak CYLA Hall ah caan karlak Matupi peng fimcawnnak ca ah tangka kawlnak cu a ralaimi March ni 11 India caan zanlei suimilam 3:00PM in 7:00PM tiang hlasak thliainak in an tuah lai, tiah theih a si.
Cu hlasak thliainak ah David Lai telh in Matupians phu le hlasak thiam Esther Saudaw sawm an si. Biatawi chimtu ah MP Pathang, MP Lal Min Thang, MP Ral Peng le Board Adivsor in sayakyi Pu Hla Pu hna an si lai, tiah theih a si.
Cu hlasak thliainak cu ram kip nih hmuh khawh ding in Matupians Page ah live an thlah te lai, tiah theih a si. Caan karlak fimcawnnak pehtlai in a kal khawhnak ding le siangngakchia hna nih an herhmi cacawnnak thilri tlam a tlin khawhnak ding ah mizapi nih a lamkip in bawmhchanh ding in nawlnak an tuah, tiah theih a si. Crd – TCP
A dang relchap – Rohingya Umnak Camp A Kangh Caah Minung 200 Hrawng An Tlau. Banladesh ram um, Koz Bazaar Balukhalira Rohingya camp No.11 cu March nin5 zanlei suimilam 2:40PM ah a kangh caah inn 2,000 a ciamh pin ah minung 200 tluk an tlau, tiah theih a si.
Banladesh ram Koz Bazaar cu minung 30,000 leng an umnak a si i, inndawng 7,000 leng a umnak Rohingya camp a si. Cu chung ah inn 2,000 hrawng a ciam, tiah theih a si. Inn 2,000 hnih a kangmi chung ah chungkhar a tling ti lomi zong an um. Cheukhat cu chungkhar kharkhat ah 5 hna an um i an i hmu kho ti lo. A tlaumi hna chung ah ngakchia zong an i tel, a tlaumi hna cu kan kawl cuahmah hna,” tiah mi bawmchantu Aung Myaing nih a chim.
Rohingya camp ah a ummi cacawnnak sianginn, sii-khan le Bali 13 zong a ciam i meikangh ruang ah hartongmi hi buaktlak in minung 10,000 tluk kan si lai, tiah hartongmi hna nih an chim.
Thawngpang kan theih ning ah cun Rohingya kan umnak camp hi mi nih an khangh tiin kan theih i runvennak tuahpiak ding in UN le Banladesh cozah sin ah nawlnak an tuah, tiah min langhter a duh lomi pakhat nih a chim.
Misualmi hna nih an khangh caah inn 2,000 hrawng a ciam. UN le Banladesh cozah nih runvennak an tuah lo i, a hlei in ralkap nih an hngah lo ahcun hi hnu hmailei ah harnak fak chin kan tong lai, tiah a chim chap.
Rohingya camp kangh ruang ah minung 12,000 tluk harnak an tong i inn 2,000 tluk a ciam. Cu chung ah sii-inn le cacawnnak sianginn he aa pehtlaimi inn 90 a ciam, tiah Banladesh ram um United Nations High Commissioner for Refugees nih cathanh an chuah. Crd – TCP
A dang relchap. Rihkhawdar Kahdohnak Ah Ralzaam Pakhat A Thi, Pathum Hliam An Tuar! Chin ramkulh, Falam peng India-Myanmar ramri khua, Rihkhawhdar No.2 sang i Ṭio tiva kam tlangcung ah a ummi SAC ralkap le tualchung hriamtlaibu hna cu tuzing August 10, zinglei 5 in 8 tiang an i kap, tiah theih a si.
SAC Ralkap hna cu Rihkhawdar No.1 sang ah a ummi an hawile nih hriamngan in an bawmh peng hna i hriamngan kuan pakhat cu khuachung ah a tlak caah Kalaymyo in a rami ralzaam pakhat a thi i khuami dang pathum zong hliam an tuar, tiah theih a si.
Rihkhawdar No.2 sang ah a ummi mizapi hna cu an dihlak ti awk in India lei kap ah an zaam dih i ramri hlei kam ah a ummi hna lawng an zaam lo, tiah theih a si. Cred. The Chin Post
A dang relchap. Chin ramkulh, Hakha ah nihin August 10 ah kahdohnak a chuak, tiah theih a si. Hakhar ummi pakhat nih, “Nihin zing sml 9:00 hrawng in Ministers umnak inn pawng le Hakha thar Meithat zung pawng hrawng in an i kap. A thawng thang tuk i kan i thup dih,” tiah The Chin Post ah a chim.
Meithal thawng cu voi tam nvai a thang. Rianṭuan ding in aa thawh mi hna zong SAC ralkap nih an kham dih hna. Atu cu a dai cang ko, kahdohnak a daih in ralkap cu lam ah an um i, mipi cu an check rih lo.
An i kah dih hnu zing sml 10:34 in hriamngan thawng cu voi li hrawng a thang, tiah a chimchap. Ref. The Chin Post
A dang relchap. Salai R. Lahnim. Lairam (Lai Autonomous District) kan timi hi Sixth Schedule to The Constitution of India tangah kum 1972 khan a hung chuak, a ram bitkauh hi 1871 sq km a si. Lairam Cozah Local Administration Department nih 2020-2021 chung i data a langhter ning ah cun Village Council (VC) 95 a um, Sub Village Council (SVC) hi 7 a um.
Lairam chungah a ummi dihlak milu hi 103,474 a si. Hi chungah nu 52,095 le pa 51,379 an si, pa nak in nu an tam deuh tinak a si. Minung 103,474 chungah minung 79,500 hrawng hi Laimi ai si i, a dang cu Bru, Chakma le miphun dang an si hna.
Khua (VC) 65 hi Laifa (Halkha, Mara, Bawm, Pang, Matu, Zophei, Lautu, Zotung, Khuafo, Khumi etc) umnak a si. Khuate ( SVC) 2 ah Lai hrinsor an um ve. Khua (VC) 95 ah 17 hi Chakma khua a si, khuate (SVC) 2 hi Chakma umnak a si fawn. Khua (VC) 16 ah Bru an um, khua ( SVC) 1 ah an um fawn. Chakma le Bru i zat in an umnak khua (VC) hi 2 a si, cu bantuk thiamthiam cun khuate (SVC) 2 a um fawn.
Hi minung 103,474 lakah Laifa tlangholh Halkha holh hmangmi hi zatuak ah 18% hrawng an um, Lai hrinsor holh (Bawm, Pang, Tlanglau, etc) hmangmi he hin zatuak ah 23% hrawng an si lai tiah ruah a si. Minung 103,474 lakah Bru holh hmangmi zatuak ah 11% hrawng an si
Chakma holh hmangmi zatuak ah 11.50% hrawng an si. Lairam chung ah hin Rakhine holh le Kawl holh hmangmi tlawmpal an um. A dang zatuak ah 50% hrawng cu Chin hrinsor Zo holh a hmangmi an si. The Lairam Times
A dang relchap. Mizoram Ah Myanmar Mi Pakhat Cu Kyats Sing 5000 Leng Man Bing He An Tlaih! India ram, Mizoram ramkulh khualipi Aizawl khuapi ah Chin miphun, Tedim peng Darkhai khuami Khup Za Tung, kum 42 sin in 428.04 gram a ritmi bing cu August 4 ah Mizoram palik le Assam Rifle nih an tlaih, tiah theih a si.
An tlaihmi bing cu Rupees sing 214 man a si i, Myanmar phaisa in sing 5770 leng a si. Myanmar ralzam hna a cohlangtu Mizoram ah Myanmar ram in rithaisii phorh lo ding in Chin hriamtlai phu, media le zatlang bu hna nih phihkhamnak an tuah ko nain atu le tu Myanmar mi hna sinin rithaisii an tlaih lengmang.
Atu bantuk ram boruak chiat lio caan cu caan ṭha ah i lak riangmang in phung lut lo sii zuar hi Mizoram um, Myanmar mi hna ca ah himlonak le thil ṭha lo a chuahter khawh tiah chimceih ngai a si. Mizoram i rithaisii tlaihnak kong ah hin a cawtu taktak le a ngeitu taktak nakin an kuttang ah a phortu hna cu an tlaih deuh hna, tiah theih a si.The Chin Post
A dang relchap. Oneness pawl nih Bible aning canglo tukin an nawnnawk dih Pathian le fapa hi pum hrang distinct person bak an si. Pa hi Fapa si bal lo hrim hrim an min hrim hrim zawng ai dang ve ve. Pa timi hi Hebrew in Yahweh ti asi. cu cu Mirâng nih Jehova tiah an leh.
Hi min hi Exodus 3:14, ah alang diam cang pinah Exodus 20:1 Nawlbia Pahra ( Ten Commandments) ah khan ” Keimah lo cu Pathian (Yahweh)- dang na ngei ding asilo tiah ati. cu pinah ” Na Pathian min Yahweh min na lam ca khawng ding asiloh” tiah ati fawn.
Jesu (Isua) min belte chu Hebrew in “Yehshua Messia” ti asi. cu cu Mirâng nih Jesus christ” tiah an leh diam. The book of Yahweh timi Bible ah cun, Pathian min pauhah Yahweh tiah achiah dih pinah Jesu min puah Yehshua tiah achiah dih fâwn.
Jesu cu aho nih dah min apek tiah cun, Philipi 2:1-10 Pâ Pathian Yahweh nih min apek mi asi. Jehova kha Jesus christ-ah a cang timi bible cafang khawzei hmanh ah um bal loh.
Yahweh ( Jehova) hi Genesis in Bethlam tiangah minung hmuh khawhin vawikhat hmanh a lang bal loh. Jesu zawng nih ” pathian an hmu bal loh” tiah amah nih achim. nain Jesu belte cu hmuh khawh, tawngh khawh bakin arâ mi asi.
Yahweh (Jehova) hi tisa in ai cang bal loh, Jesu khrih belte cu Mari nih avun hrin bakin tisa hmuh khawhin avun lang. Jesu hi thlarau ah ai cang ṭhan timi zawng Bible-ah hmuh awk aum bak loh. Jesu hi thlarau asi timi zawng aum bak fawn loh. nawnbawk bia asi. Pathian Jehova belte cu thlarau asi ti asi.
Jesu vanah akai hnuin Jesu kha Thlarau ah ai cang i Penticost niah avun ṭum ṭhan timi zawng bible cafang ah pakhat hmanh a um lo mi asi.Sangpuia Chinzah.
Japan Rammi Video Journalist Pakhat Cu Sualpuhnak Phun 2 In SAC Nih Taza An Cuai! Japan rammi video journalist le flim sertu pakhat cu sualpuhnak phun 2 in tazacuai a si, tiah SAC nih cathanh an chuah.
Japan rammi video journalist le flim sertu Toru Kubota leng ah Yangon ramṭhen, South Dagon peng ah SAC ralkap uk duhlonak langhter in lamzawhnak a tuahtu minung 2 cu SAC ralkap nih July 30 ahkhan an rak tlaih hna, tiah theih a si.
Toru Kubota cu July 1 ah tourist visa in Thailand in Myanmar ram ah a rak lut. July 30 zaanlei ah South Dagon city mart pawng i minung 15 hrawng nih SAC ralkap uk duhlo in lamzawhnak a tuahlio cu vedio a thlak caah kan tlaih, tiah SAC nih an thanh.
SAC ralkap kut in tlaih a rak ton ka ah, thlahpiak zau ding in Japan lei nih nawlnak an rak tuah, tiah theih a si. Toru Kubota cu rampi muichiattertu ti in section 505(A) in tazacuai a si, tiah theih a si.
